Дэлхийн технологийн салбарын шилдэг компани, стартап, хөрөнгө оруулагчид болон хэвлэл мэдээлэл, улс орны төлөөллүүд цугладаг WebSummit арга хэмжээнд Intelmind венчур студийн Cody амжилттай оролцоод ирлээ.

WebSummit нь 2009 оноос хойш тасралтгүй зохион байгуулагдаж ирсэн технологийн салбарын хамгийн нэр хүндтэй, олон оролцогчтой арга хэмжээнүүдийн нэг юм. Энэ жил тус арга хэмжээ Португал улсын нийслэл Лисбон хотод 11-р сарын 1-4-ний өдрүүдэд 100 гаруй орны 70 мянга гаруй зочин, 2600 гаруй стартап, 1100 гаруй хөрөнгө оруулагч, 1000 гаруй илтгэгчтэйгээр зохион байгуулагджээ.

Арга хэмжээнд Монгол Улсыг төлөөлөн хоёр дахь жилдээ Intelmind венчур студи хөгжүүлж буй төслүүдээсээ Cody-г онцлон олон улсын хөрөнгө оруулагч, хамтрагч нарт танилцууллаа. Ингэхдээ тэд Google, Microsoft, Booking.com зэрэг дэлхийн тэргүүлэх технологийн компаниудтай эн зэрэгцэн арга хэмжээний партнер болж, өөрсдийн танилцуулах хэсэгтэй (booth) оролцсон нь онцлог юм.

Cody нь худалдаа үйлчилгээний бизнест зориулсан тасралтгүй хөгжүүлэлттэй цогц платформ бөгөөд дата, хиймэл оюун ухаанд суурилсан уг платформыг shoppy.mn, next.mn, itstore.mn тэргүүтэй 100 гаруй худалдааны сайтууд ашиглаж, нийтдээ нэг сая гаруй хэрэглэгчдэд хүрдэг. Өөрөөр хэлбэл, Монгол улсын цахим худалдааны сайтуудын 80 гаруй хувь нь Cody-г ашиглан үйл ажиллагаагаа явуулж байгаа юм.